200 m2 -dən böyük sahəni əhatə edən milli stenddə Azərbaycan Turizm Bürosu ilə yanaşı, ölkəmizi “Azərbaycan Hava Yolları”, “Şahdağ” Turizm Mərkəzi, otellər və digər sənaye nümayəndələri daxil olmaqla, 34 yerli tərəfdaş təmsil edir.
Sərgidə ölkə turizminin təbliği və təşviqi ilə bağlı B2B (Biznesdən biznesə) görüşlər keçirilir, əməkdaşlıq imkanları müzakirə olunur.
Ziyarətçilərə Azərbaycanın tarixi, adət-ənənələri, mədəni irsi, milli mətbəx nümunələri, sağlamlıq və ekoturizm potensialı haqqında ətraflı məlumat verilir, həmçinin ölkənin gözəl peyzajları VR vasitəsilə nümaiş olunur.
Stendin qonaqları ölkənin müxtəlif turizm təklifləri, o cümlədən Bakının İçərişəhəri, Qobustan Qayaüstü İncəsənət Mədəni Landşaftı və şimal-qərbdə yerləşən Şəki Tarixi Mərkəzi kimi YUNESKO-nun Ümumdünya İrsi siyahısına daxil edilmiş məkanlar haqqında ətraflı məlumat əldə edirlər. Milli stenddə həmçinin Azərbaycan şirniyyatlarının dequstasiyası keçirilir.
Sərginin ilk günü Dubay şəhərində Azərbaycan Respublikasının Baş konsulunun katibi Paşazadə Xanlar ölkə stendini ziyarət edib, sərgilənən turizm məhsulları ilə tanış olub.
Qeyd edək ki, 8 iyul 2023-cü il tarixindən etibarən Azərbaycan və Birləşmiş Ərəb Əmirlikləri arasında vizasız gediş-gəliş rejimi tətbiq olunub və bu, hər iki ölkənin vətəndaşlarına digər ölkənin ərazisini 90 günə qədər vizasız ziyarət etmək imkanını yaradır.