11 avq 2025
Please select your language of preference.
Azərbaycan Turizm Bürosu və Özbəkistanın Milli PR Mərkəzinin birgə turizm təşəbbüsü olan “İpək Yolu Turları” turu istifadəyə verilir. Bu təşəbbüs qədim İpək Yolunun tarixi və mədəni irsini təbliğ etməyi hədəfləyir və səyahətçilərə hər iki ölkənin ən ikonik məkanlarını əhatə edən unikal və cəlbedici səfər təcrübəsi təqdim edir.
Tur Azərbaycanda Bakı, Şamaxı və Şəki şəhərlərini, Özbəkistanda isə Xivə, Buxara və Səmərqənd şəhərlərini birləşdirərək, zəngin mədəniyyətə sahib iki ölkəni vahid turizm məhsulu vasitəsilə bir araya gətirir. Layihə sərhədləri aşan və regionun qədim köklərə malik irsini qeyd edən dərin məzmunlu və diqqətçəkən bir səyahət imkanı yaradır.
Kampaniya çərçivəsində Azərbaycanın və Özbəkistanın aparıcı turizm sənayesi nümayəndələrindən ibarət 20 nəfərlik nümayəndə heyəti otel şəbəkələri, daxili turizm operatorları (DMC), eləcə də Azərbaycan Hava Yolları və Özbəkistan Hava Yolları Avropanın altı şəhərində keçiriləcək B2B görüşlərində iştirak edəcək. 13–24 oktyabr tarixlərində Frankfurt, Vyana, Sürix, Praqa, Budapeşt və Barselonada təşkil olunacaq tədbirlərin əsas məqsədi iki ölkə arasında turizm əməkdaşlığını gücləndirmək və “İpək Yolu Turları”nı Avropa bazarına cəlbedici məhsul kimi təqdim etməkdir.
Strateji tərəfdaşlıq layihəyə uzunmüddətli baxışı əks etdirən Anlaşma Memorandumu ilə rəsmiləşdirilir. Birgə brend və orijinal tur paketlərinin hazırlanması ilə yanaşı, hər iki tərəf Avropanın əsas şəhərlərində B2B silsilə yol şouları vasitəsilə turizm sənayesini də prosesə cəlb edir. Bu fəaliyyətlər hədəflənmiş media kampaniyaları, peşəkar vebinarlar və hər iki ölkədən aparıcı ekspertləri bir araya gətirəcək İpək Yolu Turizm Ekspertlər Klubu vasitəsilə dəstəklənir.
2025-ci ilin oktyabr ayında keçiriləcək birgə yol şouları ilə təşəbbüs artıq regional əməkdaşlıq modeli kimi sürət qazanır. Bu, Azərbaycan və Özbəkistanı bir-birinə bağlı turizm məkanları kimi mövqeləndirir və səyahətçilərə İpək Yolunu sadəcə tarixi keçmiş kimi deyil, yaşayan və inkişaf edən bir təcrübə kimi kəşf etməyə imkan verir.
Azərbaycan və Özbəkistanın birgə səyləri nəticəsində ölkələr arasında yalnız turizm potensialı genişlənmir, eyni zamanda regional əməkdaşlıq üçün güclü bir nümunə ortaya qoyulur. Bu təşəbbüs hər iki ölkənin qlobal turizm xəritəsində önəmini artırır və unikal, çoxölkəli mədəni səyahətlərə artan tələbatı qarşılayır.
