31 iyl 2025
Please select your language of preference.
30 iyul 2025-ci il tarixində Azərbaycan Turizm Bürosu (ATB) Biznes tədbirləri sənayesi alyansı (BEIA) təşəbbüsünü yenidən təqdim etdi. Bu, Azərbaycanın beynəlxalq biznes tədbirləri üçün aparıcı məkanlardan birinə çevrilməsi istiqamətində atılmış strateji bir addımdır. BEIA sektorda fəaliyyət göstərən əsas oyunçular olan aparıcı hotelləri, tədbir məkanlarını, Peşəkar konqres təşkilatçılarını (PCO) və Destinasiya idarəetmə şirkətlərini (DMC) bir araya gətirir. Bu yenilənmiş platforma yüksək səviyyəli assosiasiya və korporativ tədbirlərin cəlb olunmasına yönəlib və ATB-nin 2025–2026-cı illər üçün Biznes Tədbirləri Strategiyası ilə uzlaşır.
Təqdimat zamanı ölkənin biznes tədbirləri üzrə yol xəritəsi iştirakçılara təqdim olundu. Yol xəritəsində Azərbaycanın bu sahədəki məqsədləri, infrastruktur inkişafı və hədəf seqmentləri əks olunurdu. Görüş çərçivəsində iştirakçılar ortaq təşəbbüslər və əməkdaşlığın genişləndirilməsi imkanlarını dəyərləndirdilər ki, bu da ölkənin tədbir keçirmə qabiliyyətlərinin daha da artırılmasına xidmət edəcək. Gündəliyə, həmçinin biznes tədbirləri turizmi sahəsindəki son nailiyyətlərin və yeni yaranan bazar tendensiyalarının icmalı, eləcə də sektorda innovasiyaları təşviq etmək məqsədilə keçirilən şəbəkələşmə sessiyaları daxil idi.
Azərbaycan Turizm Bürosunun İdarə Heyətinin sədri cənab Florian Zenqstşmid iştirakçılara müraciət edərək fikir və ideya mübadiləsi apardı. O, eyni zamanda ATB-nin ölkənin biznes turizmi gələcəyinin formalaşdırılmasında lider rolunu vurğuladı. BEIA-nın yenidən təqdim olunması Azərbaycanın biznes tədbirləri üçün qlobal mərkəz kimi potensialını bir daha nümayiş etdirir. Bu hədəf ölkənin inkişaf edən infrastrukturu, zəngin mədəni irsi və davamlı sektor inkişafına yönəlmiş strateji baxışına əsaslanır.
