Azərbaycanda gəlmə turizmi ilə məşğul olan şirkətlər

üçün rəqəmsallaşdırılma proqramı

Azərbaycan Turizm Bürosu ölkəmizdə yerli, innovativ və rəqəmsal turizm məhsullarının inkişafına dəstək olmaq üçün yeni layihəyə start verir. Siz də müraciət edin və bu unikal imkanı əldən buraxmayın!

Azərbaycan Turizm Bürosu (ATB) ölkəmizdə gəlmə turizmi ilə məşğul olan şirkətlərə post-pandemiya dövründə fəaliyyətlərinə dəstək olmaq və ümumilikdə, bu sahədə innovativ, rəqəmsal yanaşmanı inkişaf etdirmək məqsədilə yeni layihə təqdim edir. Layihə Azərbaycan Turizm Agentlikləri Assosiasiyası (ATAA) və Azərbaycan Turizm Assosiasiyasının (AZTA) ilə birgə keçirilir.

Son rəqəmsal texnologiyalar turizm sənayesində daha geniş əhəmiyyət kəsb etməyə başlamış və turizm məhsulları və biznes mühitinin formalaşmasında aparıcı amilə çevrilmişdir. Rəqəmsallaşma hətta turizm məhsullarını hazırlayanların və istehlakçıların ənənəvi rollarında da dəyişikliklərə səbəb olub. Xüsusən də, pandemiya dövründən sonra rəqəmsal platformaların sayının artacağı və turizm məhsulları, xidmətləri və təcrübələrinin bilavasitə tələb əsasında, bazarın, iqtisadi amillərin və müştəri rəylərinin nəticəsində çevik formalaşacağı güman edilir. Beləliklə, qeyd edilən proqramın başlıca məqsədi rəqəmsal turizmin sahəsində təklif olunan və Azərbaycan turizm destinasiyası haqqında kontentin onlayn rejimdə yayımlanmasını təmin edən layihələrə maliyyə dəstəyinin göstərilməsidir.

ATB tərəfindən yalnız aşağıda göstərilmiş meyarlara cavab verən gəlmə turizmi ilə məşğul olan şirkətlərə və bu tarixlərdə müraciət edilmiş layihələr üçün nəzərdə tutulub.

Müraciət edən şirkətlərin layihələri yeni və ya hal-hazırda mövcud olan onlayn layihələrə əlavə, yaxud  hazır platformaların təkmilləşdirilməsi ilə bağlı ola bilər.

 

Müraciət edənlər üçün məcburi meyarlar:

  1. Azərbaycanda səyahət agentliyi və tur operator fəaliyyəti ilə məşğul olan hüquqi şəxs olmaq.
    Hər bir namizəd Azərbaycan Respublikası İqtisadiyyat Nazirliyi yanında Dövlət Vergi Xidməti tərəfindən verilmiş rəsmi qeydiyyat sənədini təqdim etməlidir.
     
  2. Müraciət edən şirkətdə minimum işçi sayı 3 nəfər olmalıdır.
    Hər bir namizəd minimum 3 nəfər işçisinin əmək müqavilələrini və ya bunu təsdiqləyən digər sənədi təqdim etməlidir. 
     
  3. Minimum turizm fəaliyyət müddəti 3 il olmalıdır.
    Təqdim olunan hər bir rəsmi qeydiyyat sənədində şirkətin ən azı 3 il turizm fəaliyyətini göstərməsi əks olunmalıdır.
     
  4. ATB və (və ya) DTA ilə əməkdaşlıq çərçivəsində beynəlxalq sərgilər, "roadshow"-lar, işgüzar iclaslar, onlayn sorğularda iştirak etməlidir, AzKB-nin üzvü olmalıdır. 
     
  5. Vergi ödəmələri ilə bağlı borcları olmamalıdır.
    Hər bir namizəd 2020-ci ilin mart ayına qədər vergi borcunun olmamasına dair Azərbaycan Respublikası İqtisadiyyat Nazirliyi yanında Dövlət Vergi Xidməti tərəfindən verilmiş sənədi təqdim etməlidir.
     
  6. “TBA 2020 Online” tədbirində iştirak etməlidir.
    Hər bir namizəd travelbusiness.az veb-saytında qeydiyyatdan keçməlidir. Tədbirdə iştirak ödənişsizdir. 
     
  7.  2019-cu ildən etibarən namizəd vasitəsilə gələn turistlərin minimum sayı 100 olmalıdır.
    Hər bir namizəd bu bəndi sübut etmək üçün müvafiq sənədləri təqdim etməlidir. Məsələn: otel və ya aviabilet vauçeri; xarici qonaqlara turizm xidməti göstərilməsi haqqında xarici tərəfdaş ilə imzalanan müqavilə.

 

Layihədə iştirak meyarları:

  1. Əsas məhsul mövzularına uyğun olmalıdır: mədəniyyət, təbiət, sağlamlıq, xüsusi maraq turizmi, kulinariya və işgüzar tədbirlər turizmi.
  2. Əsas turizm marşrutlarına uyğun olmalıdır: şimal, şimal-qərb, qərb, cənub və Bakı.
  3. “Bir daha bax” brendinə uyğun fotolardan və digər elementlərdən düzgün istifadə olunmalıdır. Ətraflı: azerbaijanbrandcenter.com
  4. Minimum iki dildə olmalıdır: Azərbaycan və ingilis dilləri (hədəf bazarına uyğun olaraq digər dillərdə əlavə oluna bilər).

Tez tez soruşulan suallar:

1. ATB-nin göstərəcəyi dəstək nədən ibarət olacaq?
ATB, ATAA, AZTA-dan ibarət komissiya tərəfindən seçilib təsdiqlənən layihələrə ATB maliyyə dəstəyi göstərəcək.

2. Maliyyə dəstəyinin təxmini məbləği nə qədərdir?
Məbləğ layihələrin əhatə dairəsinə və dəyərinə görə dəyişəcək. Bir layihə üçün ayrılan orta məbləğ 5 000 – 10 000 AZN arasında olaçağı nəzərdə tutulub.

3. Dəstək aldıqda yekunlaşdırılan layihənin hesabatını təqdim etməliyəmmi?
Bəli, maliyyə dəstəyi almış şirkət rəqəmsal həllini 2021-ci ilin mart ayına qədər ATB-yə baxılması üçün təqdim etməlidir.

4. Hansı formatda rəqəmsal layihə hazırlaya bilərəm?
Bu layihə hazırda mövcud olan, yaxud yeni veb-sayt, platforma, tətbiq, rəqəmsal gəlmə turizmi həllinin təkmilləşdirilməsi və ya hazırlanması ola bilər.

5. Şirkətim uyğun deyilsə, amma təklif etmək üçün maraqlı ideyam varsa, nə edə bilərəm?
İdeyanızı bizə elektron məktub vasitəsi ilə göndərin. Elekton poçt ünvanı əlaqə hissəsində qeyd olunub. Məktubun başlığı kimi “Rəqəmsallaşdırılma proqramı” yazın, məzmunda isə niyə uyğun olmadığınızı izah edin. Məktublarınızı nəzərdən keçirəcəyik.

6. Layihəm uğurlu olması üçün nəyə nəzər yetirməliyəm?
Azərbaycanı turizm destinasiyası olaraq xarici bazarlar üçün təbliğ edəcək keyfiyyətli və innovativ layihə və həllərə seçim mərhələsində prioritet veriləcək.

Layihənin mərhələləri:

  • 08.09.2020 – 25.09.2020 – Qeydiyyat və layihələrin qəbulu
  • 28.09.2020 – 23.10.2020 – Qiymətləndirmə və seçim mərhələsi

Sual və təkliflər üçün:   

  • Azərbaycan Turizm Bürosu: Tural İbrahimov
    [email protected] ; +994 51 229 60 78
  • Azərbaycan Turizm Agentlikləri Assosiasiyası (ATAA): Əli İsrafilov
    [email protected] ; +994 51 229 60 59
  • Azərbaycan Turizm Assosiasiyasının (AZTA): Şəhla Gözəlzadə
    [email protected] ; +994 55 444 15 87

Müraciət edin